10 دسمبر انسانئے هکّانی میاناُستمانی رۆچ/ بلۆچستان استمانئے گل
انسانئے هکّ و اۆبالانی جهانی جارنامگ 10 دسمبر 1948آ 30 بندئے تها نزّ آرگ بوت و باسکێن ملکان دزنام جتگ. اے جارنامگا درستێن باسکێن ملک منّتگێن بندانی سرا امل کنگا زمّهوار زانگ بوتگاَنت. مدنی و سیاسی هکّانی میاناُستمانی اهد و گزرانکی، راجمانی و ربێدگی هکّانی میاناُستمانی اهد دگه دو سند اَنت که اشانی ردا انسانئے هکّانی پهازگئے سرا باسکێن ملک وتا زمّهوارَ زاننت بله بژن و اپسۆز که اێران اسلامی جمهوری دگه لهتێن زۆراک و زالمێن هکومتانی پئیما نه تهنا اے سندانی بندانی سرا کارَ نکنت انسانی هکّانی جهدکار و هکپانێن رم و گلان سرکوبئے آماچ کنگا اِنت.
چه انسانئے هکّ و اۆبالانی جهانی جارنامگئے منّگا 77 سال گوَستگ و اے دراجێن مدّتے؛ دمُکراتیکێن ملکان گێشا چه گێش انسانی هکّ پهازگ بوتگاَنت و جهدکارانی بازێن مولّ و مرادے پیلئو کنگ بوتگ بله پد منتگێن ملکان که نالاهک، سلکار و زۆراکێن هاکم هکومت کنگا اَنت مردمانی گێشترێن بهرا تنتنا وتی انسانی هکّ و اۆبالانی بابتا سرپدی نێست.
اێران اسلامی جمهوریئے سررهبند تانسرپسندێن و کم کُجالێن پرکهی رهبندانی رِدا نزّآرگ بوتگ و بازێن جاگهان گۆن انسانئے هکّانی جهانی جارنامگ و اشیئے پئیوستێن سندان تزادئے تها اِنت.
اێرانا درهکومتێن راجانی جاورهال چه پارس زبان و شیهه مهزبێن مردمانی جاورهالا گنتر اِنت. نه اشانی زبانی و مهزبی هکّ دئیگَ بنت و نه راجمانی، گزرانکی و سیاسی پڑ و مئیدانان دێما شتَ کننت.
بلۆچستانا پئوجی هکومتے بالادست اِنت و اێرانئے پلیس، اینتلیجنس و سپاهِ پازداران هررۆچ بلۆچانی گرگ و بند کنگ و آزارپُجّاری و کُشگا گلاێش اَنت.
پاهۆئے شمار و آماران بچارێن گندێن که اێرانا گێشترێن پاهۆ داتگێن مردم بلۆچ اَنت و بلۆچستانئے مُچّی و جمیتئے هسابا دنیائے گێشترێن پاهۆ داتگێن مردم بلۆچ اَنت.
اێرانا سال 1401 شمسیا «جنێن، زند، آجویی» نامێن جنزے چست بوت، بلّ ترے اێرانئے رجیما اێرانئے اے دگه جاگهان هم مردم کُشت بله بلۆچستانا یکّ رۆچئے تها چه 300آ گێش مردمی کُشت و ٹپّیگ کرت تانکه اێرانئے آ دگه مردمان بترسیێنیت و بلۆچستان و واشیئے پُرهۆنێن آدێنگان په آ دگه مردمان ابرت جۆڑ بکنت چێا که بلۆچستانا مردمانی کُشگ په رجیما ارزانتر اِنت و کمترێن تاوانے دنت.
ٹێل کشّانی سرا تیرگواری، مردمان چه وتی لۆگ و ڈگاران کشّگ و در کنگ، گوَزۆکێن گاڑیانی سرا رۆڈانی سرا تیرگواری و مردێن و جنێن و چکّانی کُشگا ابێد دگه یک مزنێن زلمے که بلۆچستانا مردمانی سرا بئیگا اِنت ناشناسێن سلاهبندانی دستا مردمانی کُشت و کۆش اِنت. بازێن مردمے ناشناسێن سلاهبندانی دستا کُشگَ بنت بله چه اشانی هۆنیانی دزگیر بئیگ و سزا دئیگا هالے نرسیت.
امبری واجه ملّا کمال سلاه زهی که گوَستگێن سالان په جنگبندی و سهل و وشّانیا کۆشست کنگا اَت و بازێن جێڑهے آییئے دستا گیشّێنگ بوتگاَت اێرانئے هکومتئے هکمئے سرا و ناشناسێن سلاهبندانی دستا شهید کنگ بوت. اے پێشَ داریت که اێران اسلامی جمهوری بلۆچستانا سهل و اێمنیَ نلۆٹیت. مردمانی نیاما سهل و اێمنێن زند اشانی انسانی بُنیاتی هکّے.
بلۆچستان استمانئے گل ده دسمبرا که انسانئے هکّ و اۆبالانی رۆچ انت درستێن بلۆچ راج، آ دگه زلمآماچێن راجان و وتی ممبر و باسکان مراد باتَ گوَشیت. امێت انت که گۆن بلۆچستانئے مردم و اێرانئے آ دگه راجانی یکراهێن جهدان اێرانا انچێن رۆچ بیاینت که سجّهێن مردمان برابرێن و پورهێن هکّ برسیت.
بلۆچستان استمانئے گل/ دسمبر 2025
